”தோனியுடன் என்னை ஒப்பிடாதீங்க”: ரிஷப் பந்த் அதிரடி!

0
5

ஆஸ்திரேலிய அணிக்கு எதிரான நான்கு போட்டிகள் கொண்ட டெஸ்ட் தொடரை 2-1 என இந்திய அணி கைப்பற்றி வரலாற்று சாதனை படைத்தது. குறிப்பாக, தொடர் யாருக்கு எனத் தீர்மானிக்கும் நான்காவது டெஸ்டின் நான்காவது இன்னிங்ஸில் அதிரடியாக விளையாடி 89 ரன்கள் குவித்து இந்திய அணிக்கு வெற்றியைத் தேடித்தந்தார். அதுமட்டுமல்ல, டெஸ்ட் கிரிக்கெட்டில் அதிவேகமாக 1,000 ரன்களை கடந்த மகேந்திரசிங் தோனியின் சாதனையையும் முறியடித்தார். இதனால், இந்திய அணியின் அடுத்த ரிஷப் பந்த்தான் என கிரிக்கெட் பிரபலங்கள் கருத்து தெரிவித்து வருகின்றனர்.

தோனியுடன் இவரை ஒப்பிடுவது இது முதல் முறையல்ல. ரிஷப் பந்த் எப்போதெல்லாம் அதிரடியாக விளையாடுகிறாரோ அப்போதெல்லாம் அவர்தான் அடுத்த தோனி எனப் பலரும் கூறுவது வழக்கம். இந்நிலையில் இதற்கு முற்றுப் புள்ளி வைக்கும் விதத்தில் ரிஷப் பந்த் தற்போது பேட்டி கொடுத்துள்ளார்.

“பலர், போன்றவர்களுடன் என்னை ஒப்பிடும்போது எனக்கு ஆச்சரியமாக இருக்கும். அடுத்தவர்களுடன் ஒப்பிட்டுப் பார்க்கும் முறை எனக்குப் பிடிக்காது. நான் நானாக இருக்க விரும்புகிறேன். இந்திய அணியில் எனக்கென்று தனி அடையாளத்தை உருவாக்க விரும்புகிறேன். தலைசிறந்த வீரர்களுடன் இளம் வீரர்களை ஒப்பிட்டுப் பார்ப்பது சரியான முறை அல்ல” எனத் தெரிவித்தார்.

மேலும் அவர், “ஆஸ்திரேலிய சுற்றுப் பயணத்தில் சிறப்பான பங்களிப்பு வழங்கியதில் மகிழ்ச்சி. அனைவருமே அற்புதமாக விளையாடினோம். இது மாபெரும் வெற்றி. நாங்கள் விளையாடிய விதத்தை ஒட்டுமொத்த கிரிக்கெட் உலகமும் பாராட்டுவது அற்புதமான தருணம்” என்றார்.

இந்திய அணி முதல் டெஸ்ட் போட்டி இரண்டாவது இன்னிங்ஸில் 36 ரன்களுக்கு சுருண்டு படுதோல்வியைச் சந்தித்தது. இதற்குப் பதிலடி தரும் வகையில் அடுத்த டெஸ்டில் 8 விக்கெட் வித்தியாசத்தில் வெற்றிபெற்று அசத்தியது. மூன்றாவது டெஸ்ட் டிரா ஆன நிலையில் ஆஸ்திரேலியாவின் கோட்டையான பிரிஸ்பேனில், தொடர் யாருக்கு எனத் தீர்மானிக்கும் கடைசி டெஸ்ட் நடைபெற்றது. 1988ஆம் ஆண்டு முதல் இந்த மைதானத்தில் தோல்வியைச் சந்திக்காத ஆஸ்திரேலிய அணியை இளம் இந்திய அணி வீழ்த்தி 2-1 எனத் தொடரைக் கைப்பற்றி சாதனை படைத்தது குறிப்பிடத்தக்கது.

LEAVE A REPLY

Please enter your comment!
Please enter your name here