Ind vs Aus: காயம் காரணமாக நீக்கப்பட்ட இந்திய வீரர்களின் லிஸ்ட்!

0
3

கொரோனா ஊரடங்கிற்குப் பின் முதல்முறையாகச் சுற்றுப்பயணம் மேற்கொண்ட நாடு ஆஸ்திரேலியா. இதற்காக இந்திய அணி வீரர்கள் தேர்வு செய்யப்பட்ட நிலையில், தொடர் துவங்குவதற்கு முன்பே காயம் காரணமாக பலர் நீக்கப்பட்டனர். தற்போது சுற்றுப்பயணம் இறுதிக்கட்டத்தில் இருக்கும்போது கூட சிலர் நீக்கப்பட்டுள்ளனர். அவர்கள் யார் யார் என்பது குறித்து தற்போது பார்ப்போம்.

இஷாந்த் ஷர்மா: இந்திய அணி வேகப்பந்து வீச்சாளர் இஷந்த் ஷர்மா, ஐபிஎல் தொடரில் பங்கேற்று விளையாடிய போது காயத்தால் அவதிப்பட்டார். குணமடைய நீண்ட காலம் ஆகும் என்பதால் ஆஸ்திரேலிய சுற்றுப் பயணத்திலிருந்து நீக்கப்பட்டு, தொடர் சிகிச்சை அளிக்கப்பட்டது. தற்போது குணமடைந்துள்ளதால், எதிர்வரும் இங்கிலாந்து தொடரில் பங்கேற்பது உறுதியாகியுள்ளது.

புவனேஷ்வர் குமார்: இவரும் ஐபிஎல் தொடரின்போது காயத்தால் அவதிப்பட்டார். தற்போது குணமடைந்து சையத் முஷ்டாக் அலி டி20 கோப்பை தொடரில் பங்கேற்று விளையாடி வருகிறார்.

வருண் சக்ரவர்த்தி: தமிழகத்தைச் சேர்ந்த சுழற்பந்து வீச்சாளர் வருண் சக்ரவர்த்தியும் ஐபிஎல் தொடரின்போது காயத்தை எதிர்கொண்டதால் ஆஸ்திரேலிய சுற்றுப் பயணத்திலிருந்து நீக்கப்பட்டார். டி20 தொடரில் இவருக்கு மாற்றாக களமிறங்கிய இடதுகை வேகப்பந்து வீச்சாளர் அதிரடியாக விளையாடி அசத்தினார் என்பது குறிப்பிடத்தக்கது.

ரோஹித் ஷர்மா: இந்திய அணி துணைக் கேப்டன் ரோஹித் ஷர்மா ஐபிஎல் தொடரின்போது காயம் காரணமாக அவதிப்பட்டதால் ஒருநாள், டி20 தொடர்களில் இடம் கிடைக்கவில்லை. நான்கு போட்டிகள் கொண்ட டெஸ்ட் தொடரில் மட்டுமே வாய்ப்பு கொடுக்கப்பட்டது. விரைந்து குணமடையாததால் கடைசி இரண்டு டெஸ்ட்களில் மட்டுமே அணியில் சேர்க்கப்பட்டார்.


முகமது ஷமி: 2018-19ஆம் ஆண்டு இந்திய அணி ஆஸ்திரேலிய சுற்றுப் பயணம் மேற்கொண்டு டெஸ்ட் தொடரில் பங்கேற்ற போது ஷமி வேகத்தில் மிரட்டி அசத்தினார். இம்முறையும் அதிரடியாகப் பந்து வீசுவார் என எதிர்பார்க்கப்பட்ட நிலையில், முதல் டெஸ்டின்போது பேட் கம்மின்ஸ் வீசிய பந்தில் காயத்தை எதிர்கொண்டு, எஞ்சிய மூன்று டெஸ்ட்களிலிருந்து விலகினார்.

உமேஷ் யாதவ்: இரண்டாவது டெஸ்ட் போட்டியின்போது தொடைப் பகுதியில் ஏற்பட்ட காயம் காரணமாக உமேஷ் யாதவ் களத்திலிருந்து வெளியேறினார். காயத்தின் தன்மை குறையாததால் எஞ்சிய டெஸ்ட் போட்டிகளிலிருந்து நீக்கப்பட்டார். இவருக்கு மாற்றாக நடராஜன் அணியில் சேர்க்கப்பட்டது குறிப்பிடத்தக்கது.

மயங்க் அகர்வால்: இந்திய டெஸ்ட் அணி துவக்க வீரர் இடத்திற்கு முதன்மை தேர்வாக இருந்த மயங்க், பயிற்சியின்போது காயத்தால் அவதிப்பட்டார். காயம் விரைந்து குணமடைய வாய்ப்பில்லை என மருத்துவர்கள் கூறியதால் எஞ்சிய டெஸ்ட்களிலிருந்து விலகினார்.

கே.எல்.ராகுல்: முதலிரண்டு டெஸ்ட் போட்டிகளில் களமிறங்கவில்லை. மூன்றாவது டெஸ்டில் களமிறங்குவார் என எதிர்பார்க்கப்பட்ட நிலையில், பயிற்சியின்போது ஏற்பட்ட காயம் காரணமாக எஞ்சிய போட்டிகளிலிருந்து நீக்கப்பட்டார்.

ரவிந்திர ஜடேஜா: டி20 தொடரில் சிறப்பாகச் செயல்பட்டு இந்திய அணியின் வெற்றிக்கு உதவிக்கரமாக இருந்த இவர், டெஸ்ட் தொடரிலும் நல்லமுறையில் சோபித்தார். மூன்றாவது டெஸ்ட் போட்டியின்போது இடது கை கட்டை விரலில் காயம் ஏற்பட்டதால் கடைசி டெஸ்டிலிருந்து நீக்கப்பட்டுள்ளார். இவருக்குப் பதிலாக குல்தீப் யாதவ் XI அணியில் இணைய வாய்ப்புள்ளது.

ரிஷப் பந்த்: விக்கெட் கீப்பர் ரிஷப் பந்த் மூன்றாவது டெஸ்டில் அதிரடியாக விளையாடி 97 ரன்கள் சேர்த்து இந்திய அணியின் வெற்றிக்காகக் கடுமையாகப் போராடினார். அப்போது அவருக்குக் காயம் ஏற்பட்டது. அதனை தொடர்ந்து மருத்துவமனைக்கு அழைத்துச் செல்லப்பட்டார். காயத்தின் தன்மை குறையாததால் கிடைசி டெஸ்டிலிருந்து நீக்கப்பட்டுள்ளார்.


ஹனுமா விஹாரி: மூன்றாவது டெஸ்ட் போட்டியை இந்திய அணி வெல்ல முடியாது. டிரா மட்டுமே செய்ய முடியும் என்ற நிலை இருந்தபோது தொடைப் பகுதியில் ஏற்பட்ட காயத்தையும் பொருட்படுத்தாமல் 161 பந்துகளை எதிர்கொண்டு போட்டியை டிரா செய்து அசத்தினார். சிகிச்சை பெற வேண்டி இருப்பதால் மூன்றாவது டெஸ்ட் போட்டியுடன் நாடு திரும்பவுள்ளார்.

ஜஸ்பரீத் : இஷாந்த், ஷமி, உமேஷ் போன்றவர்கள் காயம் காரணமாக வெளியேறியதால், பும்ரா தான் முதன்மை வேகப்பந்து வீச்சாளராக இருந்தார். அவருக்கும் தற்போது காயம் ஏற்பட்டுள்ளதால் கடைசி டெஸ்டிலிருந்து நீக்கப்பட்டுள்ளார். இதனால், இந்திய வேகப்பந்து வீச்சு துறை பலவீனம் அடைந்திருப்பதாகக் கருதப்படுகிறது.

LEAVE A REPLY

Please enter your comment!
Please enter your name here